9

[previous] [next] [index]
Verani omnibus e meis amicis
antistans mihi milibus trecentis.
uenistine domum ad tuos penates.
fratresque unanimos. anumque matrem.
uenisti. o mihi nuntii beati. 5
uisam te incolumem audiamque Hiberum
narrantem loca facta nationes
ut mos est tuus. applicansque collum
iucundum os oculosque suauiabor.
o quantum est hominum beatiorum. 10
quid me laetius est beatiusue.
[previous] [next] [index]
last modified on 5/5/95.
The Obscure Organization supports experimentation in the arts and technology.

If you have questions or comments, please contact:

Richard Bullington-McGuire <rbulling@obscure.org>